पुणे : शहराच्या झपाट्याने होणाऱ्या विस्तारात धनकवडी–कात्रज डेअरी परिसरातील सामान्य नागरिकांचे दैनंदिन जीवन अनेक समस्यांनी वेढले गेले आहे. वाहतूक कोंडी, अनियमित पाणीपुरवठा, अपुऱ्या आरोग्य सुविधा आणि रोजगाराच्या मर्यादित संधी यामुळे नागरिकांच्या मनात अस्वस्थता वाढली होती. मात्र, या प्रश्नांना आशेची दिशा देत शिंदे गटाच्या शिवसेनेचे प्रभाग क्रमांक ३७ मधील उमेदवार गिरीराज तानाजी सावंत यांनी १६ कलमी विकास आराखडा जाहीर केला असून, या परिसरात नव्या पहाटेची चाहूल लागली आहे.
हा आराखडा केवळ निवडणूक जाहीरनामा न राहता, स्थानिक नागरिकांच्या भावनांना स्पर्श करणारा आणि ठोस उपाय सुचवणारा आहे. शिक्षण, आरोग्य, रोजगार, पायाभूत सुविधा, पर्यावरण संवर्धन आणि डिजिटल सेवा या सहा प्रमुख क्षेत्रांवर विशेष भर देण्यात आला आहे. आधुनिक शाळा व कौशल्य विकास केंद्रांची उभारणी, रुग्णालये व मोफत आरोग्य तपासणी शिबिरे, युवकांसाठी रोजगार मेळावे व स्टार्टअप संधी, रस्ते रुंदीकरण, स्मार्ट पार्किंग व्यवस्था, हरित क्षेत्र वाढ आणि ई-गव्हर्नन्सद्वारे पारदर्शक सेवा हे या आराखड्याचे ठळक मुद्दे आहेत.
“या भागातील प्रत्येक कुटुंबाची वेदना मी जवळून अनुभवली आहे. शिक्षणासाठी झगडणारी आई आणि नोकरीच्या शोधात असलेला तरुण – त्यांच्या स्वप्नांना दिशा देणे हेच माझे ध्येय आहे,” असे भावनिक शब्द सावंत यांनी व्यक्त केले. लोकसंख्येच्या तुलनेत अपुऱ्या सुविधांमुळे निर्माण झालेली निराशा दूर करत, हा आराखडा धनकवडी–कात्रज डेअरीला विकासाच्या नव्या मार्गावर नेईल, असा विश्वास स्थानिक नागरिकांमध्ये दृढ होत आहे.
